Mənzilinizi necə tez sata bilərsiniz?
Mənzilinizi satarkən həddən artıq tələsmək xeyir gətirmir. Evi necə sərfəli, amma tez satmaq olar? Bu mümkündürmü? Ümumən daşınmaz əmlak satışına üç yanaşma mövcuddur: özünüz, rieltor vasitəsi ilə və mülkün təcili olaraq daşınmaz əmlak agentliyi tərəfindən alınması.Özünüz evi tez sata bilərsiniz?
Əgər mənzili öz gücünüzə satmaq istəyirsinizsə, bazarda təklifləri öyrənmək, lazımi sənədləri toplamaq və qaydaya salmaq, pulunuzu reklama xərcləmək, telefonlara cavab vermək, müştərilərlə məşğul olmaq kimi səbr tələb edən və vaxt aparan işlərə hazır olmalısınız.
Düşünün: «Bunları etməyə gücüm çatarmı?». Evi təcili satmaq lazımdırsa və müddət sıxırsa, risk etməyə dəyərmi?
Bəzi satıcılar ən yaxşı mənzilə sahib olduqlarını düşünür, elan verən kimi dərhal evlərinin alınacağını sanırlar. Bu özünü aldatmaqdan başqa bir şey deyil. Reallıqda hər şey daha çətindir.
EVLƏR.AZ-əmlakınızı rahat və qısa zamanda satın!
Daşınmaz əmlakı özü satmağa çalışanların əsas səhvləri
1. Mənzilin satılması asan və tez həll olunan məsələdir. Rieltorun köməyi artıqdır. Təəssüf ki, bu belə deyil. Hazırda daşınmaz əmlak bazarı aşıb-daşır, yəni təklif tələbi dəfələrlə üstələyir. Bu baxımdan, asan və tez satış yalnız iki halda ola bilər: bəxtiniz gətirib və ya əmlakınızı bazar qiymətindən çox aşağı satırsınız. Əgər daşınmaz əmlak bazarının peşəkarı deyilsinizsə, satış asan məsələ olmayacaq.
2. Bir neçə reklam elanı verəcəm və mənə mütləq zəng edəcəklər! Əgər siz 2-3 internet saytda elan yerləşdirsəz, çox güman ki, onlar elə həmin gün analoji təkliflərin içərisində itib-batacaq. Tez satış ehtimalını qaldırmaq üçün reklama əhəmiyyətli dərəcədə resurslar xərcləməli və bunu düzgün etməlisiniz (məs. reklam platformalarının seçilməsi).
3. Mənim mənzilim ən yaxşısıdır və onu elanda göstərdiyim qiymətə alacaqlar. Bir çox satıcılar mənzillərini bazar qiymətindən çox baha satmaq istəyirlər. Mənzili belə yanaşma ilə tez satmaq alınmayacaq. Yüksək qiymət qoymaqla, öz alıcınızı uzun müddət gözləyəcəksiniz.
Sadalanan illüziyalardan qurtulduqdan sonra imkanlarınızı ayıq başla qiymətləndirərək mənzilinizi öz gücünüzə satmağa cəhd edə bilərsiniz. Proses zamanı öhdəsindən gələ bilmədiyiniz problemlər (zənglərin olmaması, sənədləşdirmə məsələsində çətinliklər) olarsa, peşəkarlara müraciət etməniz məqsədəuyğundur.
Mənzilinizi öz gücünüzə tez satmanız üçün 8 tövsiyə
Yaşayış yerində oxşar mənzillərin tələb və təkliflərini öyrənin. Bu sizə satış tezliyini proqnozlaşdırmaq və uyğun qiymət müəyyən etmək imkanı verəcək. Şəhərinizin (rayonunuzun) qəzet və internet saytlarında olan elanlara baxın və müqayisə aparın. Tənbəllik etməyin, gəzin, divarlara yapışdırılmış elanlara da baxın. Rəqib təklifləri müəyyənləşdirin. Müştəri adıyla həmin mənzillərə gedin. Rəqiblərin müsbət, mənfi cəhətlərini və qiymətləri öyrənməklə, əmlakınızın real qiyməti ilə bağlı təsəvvürünüz yaranacaq. Yadda saxlayın, ən çox müasir layihəli birotaqlı mənzillərə tələbat var. Üç və daha çox otaqlı mənzilləri tez satmaq çətindir. Rayonun prestiji də mühüm əhəmiyyətə malikdir (ekoloji vəziyyət, nəqliyyat və sosial infrastrukturun mövcudluğu).
Rəqabətə davamlı qiymət müəyyən edin. Tələsirsinizsə, qiyməti qaldırmayın. Tez satılması üçün mənzilin qiyməti ucuz olmalıdır. Nə qədər ucuz? Hər şey sizin evinizə bazarda olan tələbatdan asılıdır. Hesab olunur ki, qiymətin 10% azaldılması satış tezliyinə müsbət təsir edir. Əvvəldə qiyməti oxşar təkliflərdən minimum 4-5 min manat aşağı göstərməniz məqsədəmüvafiqdir. Qiymətin azalmasının satışa təsirini gələn zənglərin sayı göstərəcək (əlbəttə ki, yaxşı reklam şərti ilə). Zənglər azdırsa, qiyməti yenə aşağı salmaq olar.
Reklama xüsusi diqqət yetirin. Elanı nə qədər çox adam görsə, bir o qədər yaxşıdır. Reklam üçün pul və vaxtınızı əsirgəməyin. Mümkün olan bütün kanallardan, o cümlədən internet saytlardan, sosial şəbəkələrdən, qəzetlərdən, məlumat lövhələrindən istifadə edin. Elanın məzmununda mənzilinizin bütün müsbət cəhətlərini göstərin. Saytlara kifayət qədər fotoşəkil yükləyin, xəritədə yerini düzgün göstərin. Bəzi saytlarda mövcud olan elanın siyahıda yuxarı qaldırılması xidmətindən də yararlana bilərsiniz.
Satış barədə tanışlara bildirin. Onların da alıcı tapması istisna deyil.
«Alıram» məzmunlu elanlara baxın. Potensial müştərinin «bu rayonda mənzil alıram» tipli elan verməsi istisna deyil. Belə elanlar binaların girişlərində, elan lövhələrində və ya internetdə ola bilər. Bu halda sizə yalnız görüş haqqında razılığa gəlmək qalır.
Mənzili nümayiş üçün hazırlayın. İlk təəssüratın mənzilin alınması barədə qərara çox böyük təsiri var. Xoş və rahat mühit yaradın. Evi təmizləyin. Mənzilin vəziyyəti ürəkaçan deyilsə, kosmetik təmir işləri aparın.
Mənzili düzgün təqdim edin. Mehriban olun və təkid etməyin. Əvvəlcədən alıcının bütün mümkün suallarına cavablar hazırlayın. Ən populyar suallar bunlardır: «Qonşularınız necədi?», «Evi niyə satırsız?», «Bütün sənədlər varmı?», «Qaz varmı?». Yaşlı insanlar üçün mənzilin sakit və dinc rayonda yerləşməsi vacibdir. Gənc cütlüyə yaxında olan uşaq bağçaları və məktəblər barədə məlumat verin. Nümayiş zamanı alıcılara bir fincan qəhvə təklif edə bilərsiniz.
Alqı-satqı üçün bütün zəruri sənədləri əvvəlcədən hazırlayın. Bütün sənədlər hüquqi cəhətdən «təmiz» olmalıdır. Sənədlər paketinin vaxtında hazırlanmaması satış prosesinin uzanmasına səbəb olan əsas amillərdən biridir. Mənzilə hüququ olan şəxslərin razılıq ərizələrini əvvəlcədən alın. Ola bilər ki, alıcı müqaviləni nümayişdən dərhal sonra bağlamaq istəsin. Mənzilin planını alıcıya verməniz də pis olmaz. Ona baxan alıcı, artıq xəyalən mənzildə öz mebellərini yerbəyer edəcək.
Rieltor mənzili tez sata bilərmi?
Peşəkar rieltor mənzilin satış məsələsini çox tez bir zamanda həll edə bilər. Əgər daşınmaz əmlakın satışı üzrə bütün kompleks tədbirlərin həyata keçirilməsi üçün kifayət qədər vaxt və bacarığınız yoxdursa, ən yaxşısı bu işi peşəkara tapşırmaqdır.
Savadlı mütəxəssis sizin üçün bütün işləri görəcəkdir. Rieltorlar adətən işləri üçün satış məbləğini 2-3%-ni istəyirlər. Bəzi peşəkarlar xidmətlərinə görə 6% istəyə bilər. Bəzən bu daha böyük məbləğ ola bilər, amma təcili pul lazım olanda bu özünü doğruldur. İstənilən halda siz konkret qiymətdə təkid edə bilərsiniz.
Peşəkar rieltorun xidmətlərindən istifadənin əsas müsbət cəhətləri
Rieltor mənzili düzgün qiymətləndirməklə tez satılması üçün real qiyməti müəyyənləşdirəcək. Rieltorlar bazarın tendensiyalarını daim izləyirlər. Tələb və təkliflər barədə real vaxtda məlumatlı olmaları onlar üçün qiymətin düzgün müəyyənləşdirilməsi işini çox asanlaşdırır.
Sənədlərin hazırlanması ilə özünüz məşğul olmaq istəmirsinizsə, bu işi rieltora tapşıra bilərsiniz. Bunun üçün, rieltorun adına «sənədlərin toplanması üzrə etibarnamə» verməniz lazım olacaq.
Rieltorların reklam üçün effektiv və işlək sxemləri var. Onların əlinin altında onlarla reklam meydançaları var. Obyektlərin reklamı daşınmaz əmlak agentliklərində axına qoyulub, ona görə də peşəkar rieltora müraciət etməklə siz reklamdan narahat olmaya bilərsiniz. Sizin elan hər yerdə olacaq.
Rieltor bazarlığı və mənzilləri düzgün təqdim etməyi yaxşı bacarır. Demək olar ki, uğurlu satışın 50%-i mənzilin düzgün təqdimatından asılıdır. Alıcının nümayişdən əvvəl müəyyən şübhələri olsa belə, rieltorun müştərini inandırmaq sahəsində böyük təcrübəsi mənzilin satılmasına kömək edəcəkdir.
Yuxarıda sadalananlar müvafiq sahədə ixtisaslaşmış rieltorlara aiddir. Bu baxımdan, gərəksiz riskdən qaçmaq üçün çalışın nüfuzlu agentliklərə və rieltorlara müraciət edin. Hətta bəzən peşəkar rieltor çox faiz istəsə belə, sonda mənzilin tez satılması üçün razılaşmağa dəyər.
Mənzilin daşınmaz əmlak agentliyi tərəfindən alınması
Təcrübə göstərir ki, hətta qiymət xeyli ucuz olsa belə, həftə ərzində mənzil reallaşdırmaq çox çətindir. Belə olan halda, siz mənzilinizi daşınmaz əmlak agentliyinə təklif edə bilərsiniz. Bu prosedur özündə nəyi ehtiva edir? Əgər mənzilinizin satış üçün yararlı xüsusiyyətlərə (likvidliyə) malikdirsə, agentlik onu bazar qiymətindən 30-40% ucuz ala bilər. Daha sonra agentlik həmin mənzili tələsmədən aldığından xeyli baha qiymətə realizə edəcəkdir. Alınma proseduru cəmi bir neçə gün çəkir və xeyli vəsait itirsəniz belə, praktiki olaraq əmlaka görə pulu dərhal alırsınız. Qeyd edilməlidir ki, mənzillərin təcili alınmasını hər agentlik həyata keçirmir. Hər şey mənzilinizin cəlbediciliyindən və sizin nə qədər güzəştə getməyə hazır olmanızdan asılıdır.
Məqalənin faydalı olduğunu düşünürsüzsə, dostlarınızın da görməsi üçün paylaşın.
